المرا المغربية – الزجالة شيماء جعدي
قالو الناس مالين الحكمة وفالمرا المغربية نشدو الف كلمة
قالو الحياة بلا ها ماعندها قيمة
العيون السود و الشامة
الخدود ورود زادوها وسامة
قمرة ضاوية فسما مظلمة
التباتة و الرزانة و زايداها بالحشمة
الزين و العقل علاوها شان و همة
المرا المغربية زينة الفعال و التربية
مولات القفطان بالخياطة التقليدية
التشامير و الشربيل و السبنية
زينها بلدي وردة بروح الزهر مسقية
ما تحتاج ماكياج ولا مراية
كانت شلحة عربية صحراوية او جبلية
كلامها شهدة بالعسل مروية
تسمعو تولي همومك منسية
حسدونا الغراب عليها
و قصدو المغرب يطلبو يديها
على الصواب و الاداب لي مربية عليها
شرفات بلادنا ربي من عديانها يحضيعا
متقفة معلمة قارية و واعية
ولي ما قرات حاربات الامية
و للتعلم و الاستفادة هي ساعية
و جميع المجالات منها دارية
الرياضية التقافية الاقتصادية و حتى السياسية
و فالعمل هي و الراجل سواسية
حتلات المراتب الاولية :الوطنية و العالمية
و علات فبلادات الناس الراية المغربية
تقصد دارها تبقا تالف
التقليدي طبعها و ليه ما تخالف
و باحسن ما عمدها ليك ضايف
اش منك يا حلاوي و رغايف
و الابتسامة مرسومة عالشفايف
و لعائلتها حبها كبير ما مزيف
المرا المغربية او غيرها شانها شان عظيم
وصى عليها القران و السنة من قديم
و لي ماعرف قيمتها مم الفهامة عديم
ولي تجبر عليها خلات ليه الله العليم
